ភ្នំពេញ ៖ មន្ដ្រីនាំពាក្យគណបក្សប្រជាជនកម្ពុជា លោកសុខ ឥសាន បានលើកឡើងថា នៅក្នុងរដ្ឋធម្មនុញ្ញក៏ដូចជាច្បាប់នានានៃព្រះរាជាណាចក្រកម្ពុជា មិនបានកំណត់ថា បេក្ខភាពនាយករដ្ឋមន្ដ្រី មានតែលោកសម រង្ស៊ី និងសម្ដេចតេជោហ៊ុន សែន នោះទេ។
ការលើកឡើងរបស់មន្ដ្រីនាំពាក្យរូបនេះ ជាការប្រតិកម្មតបនឹងសម្ដីរបស់លោកសម រង្ស៊ី ប្រធានគណបក្សប្រឆាំងដែលបានចោទមកលើគណបក្សកាន់អំណាចថា តែងតែព្យាយាមរករឿងគណបក្សសង្គ្រោះជាតិ ដែលជាគណបក្សតែមួយដែលមានលទ្ធភាពគ្រប់គ្រាន់ក្នុងការប្រកួតប្រជែងជាមួយគណបក្សប្រជាជនកម្ពុជា។ ជាពិសេសទៀតនោះ គឺគណបក្សកាន់អំណាច កំពុងតែព្យាយាមកម្ចាត់លោកសម រង្ស៊ី ចោល ព្រោះបេក្ខភាពនាយករដ្ឋមន្ដ្រីមានតែ២នាក់គត់ គឺរូបលោក(សម រង្ស៊ី) និង សម្ដេចតេជោហ៊ុន សែន។
លោកសុខ ឥសាន បានលើកឡើងក្នុងបទសម្ភាសន៍ជាមួយរស្មីកម្ពុជា នារសៀលថ្ងៃទី៣០ ខែសីហា ថា “...មានច្បាប់ពីណាមកពីណាអ្នកតម្រូវថា ឲ្យមានគូសម រង្ស៊ី និងហ៊ុន សែនហ្នឹង...គាត់និយាយនេះដូចជាលើកខ្លួនឯងពេក...ដូចអត់ពីគាត់ទៅគេរស់មិនបានមនុស្សមួយស្រុកខ្មែរ”។
លោកបានបន្ដថា រហូតមកទល់បច្ចុប្បន្ននេះ គណបក្សនយោបាយនៅប្រទេសកម្ពុជា មានជាង៦០ទៅហើយហើយក្នុងនោះបេក្ខភាពនាយករដ្ឋមន្ដ្រីយ៉ាងហោចណាស់ក៏មានជាង១០នាក់ដែរដែលនេះសរបញ្ជាក់ពីការអនុវត្តន៍គោលការណ៍លទ្ធិប្រជាធិបតេយ្យសេរីពហុបក្ខយ៉ាងពេញលេញ។
លោកសុខ ឥសាន បានបន្ថែម បើទោះបីជាអត់គណបក្សសង្គ្រោះជាតិ អត់រូបលោកសម រង្ស៊ីក៏គណបក្សប្រជាជនកម្ពុជានៅមានគូប្រកួតជាច្រើនទៀតដែរ។
ដោយឡែក រំលឹកពីការជាប់ទោសរបស់លោកសម រង្ស៊ី, លោកសុខ ឥសាន ក៏បានលើកឡើង ដែរថា លោកសម រង្ស៊ីនឹងគ្មានផ្លូវរួចទោសនោះទេ ព្រោះថា មានតែសម្ដេចតេជោ តែម្នាក់គត់ដែលអាចចុះហត្ថលេខាលើកលែងទោសបានហើយបើសម្ដេចបានប្រកាសដាច់ណាត់ហើយនោះនោះ គឺច្បាស់ណាស់ថា គ្មានជម្រើសទី២នោះឡើយ ពោលគឺ បើលោកសម រង្ស៊ី ចង់ចូលស្រុកខ្មែរវិញគឺត្រូវទទួលទោសតាមច្បាប់៕ -